David Villa fiskaði tvö víti og Atlético fylgir Barcelona sem skugginn

Atlético Madrid er einu stigi á eftir toppliði Barcelona í spænsku úrvalsdeildinni í fótbolta eftir 2-1 útisigur á Granada í kvöld. Bæði mörk Atlético-liðsins komu úr vítaspyrnum sem David Villa fiskaði.

Barcelona er með 31 stig en Atlético Madrid, sem hefur unnið 10 af 11 leikjum sínum á tímabilinu, er með 30 stig. Real Madrid er síðan í þriðja sætinu með 25 stig.

Atlético Madrid endaði leikinn tíu á móti ellefu eftir að Filipe Luis fékk sitt annað gula spjald á lokamínútunni.

Diego Costa skoraði fyrra mark Atlético úr vítaspyrnu á 38. mínútu og skaust þar með framúr Cristano Ronaldo á markalistanum en Ronaldo jafnaði hann með því að skora þrennu í gær. Diego Costa hefur skorað 12 mörk í 11 leikjum.

David Villa fiskaði vítið sem Diego Costa skoraði úr og fékk síðan annað víti á 78. mínútu sem hann nýtti sjálfur. David Villa er kominn með fimm deildarmörk á sínu fyrsta tímabili með Atlético Madrid.

Odion Ighalo minnkaði muninn fyrir Granada á lokamínútu leiksins en nær komust heimamenn ekki.