Hanna lampastand fyrir iPhone

Hönnunarteymi í London hefur nú nýtt sér iPhone til þess að útbúa lampa. Eins og margir eflaust vita er hægt að kaupa app til þess að geta nýtt símann sem vasaljós. Þetta kemur fram á vefsíðunni Mashable.

Teymið útbjó stand þar sem hægt er að koma símanum fyrir þannig að hann geti tildæmis nýst sem lampi til að hafa við rúmið sitt.

Það er ekki nauðsynlegt að kaupa sérstakt app í því skyni að nota iPhone sem vasaljós. Margir hafa eflaust áttað sig á því hvernig hægt er að nota iPhone sem vasaljós, með því einfaldlega að fara inn í myndavél símans, stilla á myndbandsupptöku og kveikja á flassinu. Það þarf ekki að kveikja á upptöku til þess að þetta virki. Flassið hefur nýst fólki ágætlega þegar þarf að lýsa upp í myrkri.

Hönnuðirnir sýndu lampana nýlega á sýningunni London Design Festival. Lamparnir verða einnig  til sýnis á söfnunum, Museum of Modern Art í New York ogTel Aviv Museum of Art. Samkvæmt Mashable eru engar heimildir fyrir því að lampinn sé kominn í búðir né hvenær af því verður.