Sannleikurinn: Fjölga þarf lögreglukonum til að kynferðislegt áreiti dreifist á fleiri konur

Aðeins þriðjungur lögreglukvenna verður fyrir kynferðislegu áreiti í vinnunni segir Guðbjarni Kjartansson, aðstoðaryfirlögregluþjónn á höfuðborgarsvæðinu, og segir hann fréttaflutning í dag gera of mikið úr vandamálinu.

Um 12% lögreglumanna starfandi í dag eru konur þrátt fyrir að þær hafi verið 17-33% brautskráðra nemenda frá Lögregluskóla ríkisins síðan 1999. Brotthvarf kvenna frá lögreglunni er því verulegt. Guðbjarni segir því álagið á lögreglukonur mikið og betra væri ef öllu kynferðislega áreitinu, niðrandi athugasemdunum og niðurlægingunni væri dreift á fleiri konur.

Segir hann lögregluna vera frábæran starfsvettvang og að hann og strákarnir á deildinni hans séu ánægðir í starfi þrátt fyrir að nýleg könnun sýni að einn af hverjum fimm lögreglumönnum verði fyrir einelti í vinnunni. „Það eru náttúrulega skemmd epli allstaðar, það á við um allar stéttir,“ segir Guðbjarni. „Við erum með virka eineltisáætlun hér á höfuðborgarsvæðinu og munum komast að því hverjir eru að klaga. Það er ekkert pláss fyrir þá sem kunna ekki að spila saman sem lið hjá okkur.“

Í könnun sem embætti ríkislögreglustjóra og Háskóli Íslands stóðu fyrir á vinnumenningu meðal starfandi lögreglumanna og kom út nú fyrir skemmstu, kemur fram að kynferðisleg áreitni er svo algeng innan lögreglunnar að hún er næstum óstarfhæf vegna mannvonsku, pervertisma og vanhæfni yfirmanna til að bregðast við, yfirmanna sem oft á tíðum eru gerendur í einelti og áreiti.

Þessu vísar Guðbjarni á bug. Hann segir alltaf einhverja ósátta á stórum vinnustöðum og allt tal um að gríðarlegt vandamál sé innan lögreglunnar sé bara eitthvað „kerlingavæl“.

„Strákar eru náttúrulega bara strákar. Það hverfur ekkert bara við að fara í lögreglubúning. Auðvitað gætu þær lögreglukonur sem eru ósáttar, finnst að þeim vegið, bara komið hérna inn á skrifstofuna til mín í eintal og tilkynnt atvikin. En það gæti náttúrulega þýtt það að menn verði ósáttir. Möguleikar þeirra kvenna á frama innan lögreglunnar færu úr því að verða litlir í að verða engir,“ segir Guðbjarni.

Þá kemur einnig fram í könnuninni að fyrir utan kynferðislegt áreiti, einelti og hægum eða engum frama kvenna innan stéttarinnar þá líti þrír af hverjum tíu körlum innan lögreglunnar svo á að karlar séu hæfari en konur og betri stjórnendur. 

Umsóknarfrestur í Lögregluskóla ríkisins rennur út 26.október og eru konur hvattar til að sækja um.





Sannleikurinn rekur öfluga og óvæga fréttastofu þar sem engum er hlíft og sannleikurinn skiptir ekki höfuðmáli. Sannleikurinn er háður öllum stjórnmálaflokkum og hagsmunaaðilum um fréttaefni sitt. Fréttastofa Sannleikans hefur Facebook-síðu  þar sem allir eru áreittir jafnt.