Vertu meistari í þér - alltaf

Nú tek ég þetta alla leið. Meistaramánuður genginn í garð og ég ætla að taka út allan hvítan sykur, ger hveiti og glúten. Svo er ég búin að skrá mig á LKL námskeið, kaupa bókina og fyrsti dagurinn í detoxi í dag. Nú verður sko djúsað fyrir allan peninginn enda þarf ágætis magn til að skola öllu maca, chia og lucuma draslinu niður þrátt fyrir hörfræolíuna.

Hæ, ég heiti Anita. Ég er súperkona, hamingjuþerapisti og sérfræðingur í frábæru týpunni. Er ekki kominn tími til að hætta þessu öfgafulla kúrastandi og taka upp holla og heilbrigða lífshætti til frambúðar? Meistaramánuð er svo sannarlega hægt að nýta til að dusta rykið af markmiðunum, fara út fyrir þægindahringinn og hrista af sér hversdagsslenið, en hvað gerist?Í stað þess að að virkja þessa jákvæðu hvatningu sem bensín undir draumana, fara mörg okkar hina leiðina og herða kverkatakið í enn einu heilsuátakinu sem er í raun, ekkert annað en hin bannfærða megrun í dulargerfi.

Að vera meistari þýðir að vera bestur á meðal jafningja og hver er betri í mér en ég? Ég ætla að nýta meistaramánuðinn sem áminningu um að vera sjálfri mér best.

Ef þú ætlar að halda heilsuátakinu til streitu þá legg ég til, svona áður en þú dettur í eineltishegðun gagnvart sjálfinu, að heimsækja þinn innri mann og kanna, með neðangreint til hliðsjónar, hvort markmiðin sem þú settir séu í raun það besta fyrir þig.

Það fyrsta er að setja saman framtíðarmynd af þínu daglega formi

Skrifaðu fyrirsögnina „ég er..“ og lýstu því hvernig þér líður eins og þú sért nú þegar í þínu uppáhalds daglega formi (þá á ég við form sem raunhæft er að vera í frá degi til dags). Sem dæmi þá er mín svona: „Ég er heilbrigð, hraust og kvenleg. Ég er í jafnvægi, full af krafti, lífsorku og eldmóð sem gerir mér kleift að sinna öllum mínum áhugamál, hugðarefnum og skyldum.

Síðan er að kanna hvað þetta þýðir í raun

Skrifaðu fyrirsögnina „mitt upphálds daglega form er..“ og klára setninguna með lýsingu á framtíðarmynd þinni. Sem dæmi þá er mín lýsing: „Að vera sterk svo ég geti gert það sem ég vil en vera þó ekki með áberandi vöðva. Að vera mjúk en samt ekki feit (samkvæmt minni eigin skilgreiningu, takk fyrir), full af krafti og lífsorku og með góða tengingu milli líkama og sálar.

Þriðja er að búa til lista yfir allt þú elskar

Skrifaðu niður allt sem þú elskar við mat og matargerð og einnig allt sem flokkast getur undir líkamlega áreynslu. Virkjaðu ímyndunaraflið og hugsaðu um hreyfingu svo sem garðyrkju, dans, heimilisframkvæmdir eða kelerí.

Líttu eftir samnefnara eða þema; hvernig týpa ert þú? Ert þú hópsál eða einfari, keppnistýpa eða munúðarfullur mjaðmahnykkjari? Ef þú elskar að elda þá ert þú í góðum málum og skellir þér í tilraunamennsku. Ef þú elskar að borða ert þú í góðum málum líka og ferð að njóta alvöru matar beint frá náttúrunni.

Fjórða er að skrifa lista yfir allt sem þig langar til að prófa

Hvaða reglulega líkamsrækt gæti mögulega tengst þínum samnefnara? Þú ert ekki glötuð sál þó þér leiðast hlaup eða cross-fit. Skoðaðu tímatöflur stöðvanna og þau fjölmörgu námskeið sem eru í boði. Athugaðu hvort þú finnir eitthvað sem vekur upp svipaðar tilfinningar og áhugamálin gera. Taktu ábyrgð á heilsunni, njóttu lífsins og elskaðu allt sem þú gerir. Gefðu þér frelsi til að gera tilraunir og nýta alla prufutíma sem í boði eru. Þumalputtareglan er; prófaðu einu sinni og hættu strax ef þetta er alls ekki fyrir þig. Ekki pína þig. Gefðu því mánuð ef þú ert ekki viss og hafðu nýja hugmynd tilbúna til prufukeyrslu áður en mánuðurinn er úti.

Njóttu alvöru matar, slepptu draslinu og gæddu þér á köku með góðri samvisku. Settu þér markmið af kærleika í eigin garð og vertu meistari í þér, alltaf. Þeim sem hafa hug á að vinna með mér og eru tilbúnir að opna fyrir allt sem lífið hefur upp á að bjóða er velkomið að panta frían 15 mín mátunartíma á https://AnitaSig.com/bookings.

Vertu frábær,

Anita

AnitaSig.com

Post by Lífið á Visir.is.