Best Buy upprisa ársins

Hlutabréf í rafvöruverslanakeðjunni Best Buy hafa hækkað hvað mest allra fyrirtækja í kauphöllinni vestan hafs það sem af er ári, eða um 158%. Til samanburðar lækkaði gengi bréfa í fyrirtækinu um helming á síðasta ári.

Á viðskiptavef CNN trónir Best Buy hæst á lista yfir upprisur ársins, en þar fyrir neðan eru meðal annars tölvuleikjaframleiðandinn Electronic Arts og tölvuframleiðandinn Hewlett Packard, sem sneri 45% falli í fyrra upp í 88% vöxt það sem af er ári.

Lykillinn að uppgangi Best Buy er meðal annars bætt viðmót til netverslunar og sparnaður í húsnæðisrekstri með því að leyfa fyrirtækjum eins og Samsung og Microsoft að opna búðir inni í verslunum Best Buy.