Danske Bank: Evrópska skuldakreppan brátt að baki

Nýjar hagtölur í Evrópu sýna að evrusvæðið er í sókn í efnahagsmálum. Danske Bank segir af því tilefni að skuldakreppan í Evrópu muni brátt heyra sögunni til.

Fjallað er um málið í Jyllands Posten og vitnað í nýtt álit sem Danske Bank sendi frá sér í morgun. Þar er vitnað í nýjar PMI tölur sem sýna framgang í iðnaðarframleiðslu skuldsettra landa á borð við Ítalíu og Spán. Hvað evrusvæðið í heild varðar jókst PMI vísitalan fyrir iðnaðarframleiðslu úr 46,7 í 48,3 stig.

Danske Bank segir að jafnvel Grikkland sýni framfarir í efnahagsmálum sínum þessa dagana. Raunar hefur komið fram í fréttum yfir helgina að Alþjóðagjaldeyrissjóðurinn er ánægður með árangur grískra stjórnvalda og mun því greiða þeim næsta hluta af neyðarláni sjóðsins til Grikklands.

Þá kemur fram að búið er að endurmeta PMI tölurnar fyrir Frakkland og Þýskaland og uppfæra þær þannig að framgangurinn sem var í apríl nær einnig til maí mánaðar. Danske Bank segir að þessar tölur þýðir samt ekki að bullandi uppgangur sé í vændum, til þess sé bankakerfi álfunnar enn of laskað og fasteignamarkaðir áfram í lægð.

Dansk Bank gerir ráð fyrir að hagvöxtur verði jákvæður að nýju á evrusvæðinu á næsta ári.