Rannsaka gróft brot á æfingareglum

Keppnislið Red Bull og Ferrari í Formúlu 1 eru mjög óánægð með leynidekkjaprófanir Pirelli og Mercedes eftir kappaksturinn á Spáni. Enginn vissi að prófanirnar færu fram, ekki einu sinni FIA sem rannsakar nú hvort einhverjir hafa gerst brotlegir gegn reglum Formúlu 1.

Reglurnar kveða á um að keppnislið meiga ekki æfa eða prófa utan keppnishelga á meðan keppnisvertíðin stendur yfir. Æfingarnar meiga fara fram á fyrirfram ákveðnum dagsetningum sem liðin og FIA semja um.

Í vikunni eftir kappaksturinn í Barcelona ók Mercedes-liðið 1000 kílómetra á þremur dögum á brautinni á Spáni. Pirelli, eini dekkjaframleiðandinn sem skaffar liðunum dekk, átti frumkvæðið að prófununum og bað Mercedes um að útvega sér ökutæki af árgerð 2013.

Ekki er leyfilegt að aka, prófa eða safna gögnum á brautum utan keppnishelga nema á bílum sem eru eldri en 2010 árgerðir.

Ross Brawn liðstjóri Mercedes og fulltrúar Pirelli voru kallaðir á fund dómara og fulltrúa FIA í Mónakó eftir kappaksturinn í dag. Ekki er enn víst hver niðustaða dómaranna verður en líklegt þykir að báðum aðilum verði refsað með stórri fjársekt. Ekki verður fiktað í úrslitum kappakstursins í Mónakó.

Mark Webber, ökumaður Red Bull, segir sigur Nico Rosberg í Mercedes-bílnum í dag ekki vera vegna þessara dekkjaprófana. "Ég held að við höfum aðallega verið hissa á því að prófanirnar hafi farið fram. Ég geri samt ekki ráð fyrir að þær hafi haft mikil áhrif á úrslitin í dag. Í hreinskilni sagt hefði þessi bíll hvort sem er staðið vel að vígi hér í Mónakó."