Áslaug og Birgitta tilnefndar til Barnabókaverðlauna Norðurlandaráðs

Áslaug Jónsdóttir og Birgitta Sif eru tilnefndar fyrir hönd Íslands til Barnabókaverðlauna Norðurlandaráðs, sem afhent verða í fyrsta sinn á þessu ári.

Tilnefningarnar voru kynntar á bókmenntahátíðinni í Lillehammer, sem hófst í gær. Áslaug Jónsdóttir er tilnefnd fyrir bókina Skrímslaerjur, ásamt meðhöfundum sínum Kalle Güettler og Rakel Helmsdal en Birgitta Sif fyrir bókina Ólíver. Báðar bækurnar komu út hjá Máli og menningu í fyrra.

Auk Áslaugar og Birgittu voru höfundar frá Danmörku, Finnlandi, Noregi, Svíþjóð, Færeyjum, Grænlandi, Álandseyjum og samíska málsvæðinu einnig tilnefndir.

Ákveðið var að koma verðlaununum á laggirnar á þingi Norðurlandaráðs í Helsinki í nóvember og verða þau sjálfstæð frá Bókmenntaverðlaunum Norðurlandaráðs. Tilkynnt verður um sigurvegara í Osló í október. Verðlaunféð er 350 þúsund danskar krónur eða tæplega 7,5 milljónir íslenskra króna.