Þau bestu synda í Laugardalnum

Íslandsmeistaramótið í sundi í 50 metra laug hófst í sundmiðstöðinni í Laugardal í morgun. 132 bestu sundmenn landsins mæta til keppni ásamt erlendum gestum.

Vænta má spennandi keppni í 50 metra skriðsundi kvenna en þar eru Ingibjörg K. Jónsdóttir og Karen Sif Vilhjálmsdóttir báðar frá SH búnar að vera hraðar á síðustu mótum.

Bryndís Bolladóttir, 14 ára stúlka frá Akureyri, gæti verið líkleg til afreka á þessu mótinu. Hún á fjórða besta skráða tímann í 50 metra skriðsundinu.

Ólympíufararnir Anton Sveinn McKee og Eygló Ósk Gústafsdóttir verða einnig í sviðsljósinu í dag. Anton Sveinn keppir í 400 metra skriðsundi en Eygló Ósk í 200 metra fjórsundi.

Í 50 metra flugsundi verður fróðlegt að fylgjast með Orra Frey Guðmundssyni SH sem hefur synt hratt að undanförnu. Í 200 metra flugsundi kvenna er Ólöf Edda Eðvarðsdóttir úr ÍRB ein þeirra sem er til alls líkleg.

Undanrásir fara fram fyrir hádegi en úrslit hefjast klukkan 17.30. Nánari upplýsingar um tímasetningar einstakra greina má finna hér.