Räikkönen segir sigurinn engu breyta

Kimi Räikkönen segir Lotus-liðið sitt ekki ætla að breyta áætlunum sínum fyrir malasíska kappaksturinn aðeins vegna þess að hann er efstur í stigamótinu eftir sigurinn í Ástralíu.

Finnanum tókst að vinna mótið í Ástralíu eftir að hafa farið betur með dekkin en keppinautar sínir. Þannig tókst honum að stoppa aðeins tvisvar til þess að sækja sér ný dekk og hafði yfirhöndina á brautinni fyrir vikið.

Lotus-liðið telur Sepang-brautina í Malasíu jafnvel henta keppnisbíl sínum betur en brautin í Melbourne. Einnig hefur bíllinn verið uppfærður, pústið hefur verið tekið í gegn og yfirbyggingin. Lotus telur sig því vera sigurstranlega í næstu keppni.

Þegar blaðamaður Autosport spurði hann hvernig væri að vera sá sem allir þyrftu að skáka í Malasíu sagði Räikkönen sig ekki vera eiginlegt skotmark. „Við ætlum ekki að gera neitt öðruvísi þessa helgina heldur en við höfum gert síðastliðið ár."

Ísmaðurinn segir það ekki breyta neinu hvort hann sé fremstur eða aftastur, keppnin fari alltaf fram og maður þurfi alltaf að klára. „Það skiptir því engu hvort við erum fremstir um þessa helgi eða einhverja aðra."

„Við munum gera okkar besta og vonandi krækjum við í stig," sagði Kimi. Spurður um aðstæðurnar í Malasíu sagði hann: „Ég hef ekki gaman af hitanum og rakanum hér en brautin er fín. Við vitum samt hvernig þetta er hér í Malasíu og yfirleitt náum við góðum úrslitum."