Vettel á ráspól í fyrsta móti ársins

Heimsmeistarinn Sebastian Vettel náði sínum 37. ráspól í tímatökunum fyrir ástralska kappaksturinn sem lauk rétt í þessu. Tímatökunum hafði verið frestað vegna aðstæna á brautinni í gærmorgun.

Brautin þornaði hratt í síðustu tveimur lotum tímatökunnar og snerist kapphlaupið um að vera síðastur yfir línuna í þriðju og síðustu lotunni. Vettel var hins vegar lang fljótastur og þrátt fyrir tilraunir keppinauta hans hélt hann tæpla hálfrar sekúnda forskoti.

Jenson Button á McLaren var fyrstur til að fara út á sléttu dekkjunum í síðustu lotunni, það varð honum á endanum að falli og ræsir hann tíundi í kappakstrinum í fyrramálið.

Mark Webber, liðsfélagi Vettels hjá Red Bull, verður annar á ráslínunni á heimavelli. Lewis Hamilton þriðji en honum tókst að skáka liðsfélaga sínum sem hafði verið fljótastur í bleytunni. Liðsfélaginn, Nico Rosberg, ræsir sjötti.

Felipe Massa var á undan liðsfélaga sínum hjá Ferrari, Fernando Alonso og ræsa þeir í fjórða og fimmta sæti. Kimi Raikkönen verður sjöundi og liðsfélagi hans hjá Lotus, Romain Grosjean, áttundi.

Kappaksturinn hefst klukkan sex í fyrramálið og er í beinni útsendingu á Stöð 2 Sport.

Nr.	Ökuþór	Lið	Tími
1	Sebastian Vettel	Red Bull	01:27.4
2	Mark Webber	Red Bull	01:27.8
3	Lewis Hamilton	Mercedes	01:28.1
4	Felipe Massa	Ferrari	01:28.5
5	Fernando Alonso	Ferrari	01:28.5
6	Nico Rosberg	Mercedes	01:28.5
7	Kimi Räikkönen	Lotus	01:28.7
8	Romain Grosjean	Lotus	01:29.0
9	Paul di Resta	Force India	01:29.3
10	Jenson Button	McLaren	01:30.4
11	Nico Hülkenberg	Sauber	01:38.1
12	Adrian Sutil	Force India	01:38.1
13	Jean-Eric Vergne	Toro Rosso	01:38.8
14	Daniel Ricciardo	Toro Rosso	01:39.0
15	Sergio Perez	McLaren	01:39.9
16	Valtteri Bottas	Williams	01:40.3