Andstæðingur Gunnars hefur leikið á móti Van Damme og Lundgren

Eins og fram kom á Vísi í morgun mun Gunnar Nelson keppa við Bandaríkjamanninn Mike Pyle í Las Vegas þann 25. maí næstkomandi.

Pyle er 37 ára gamall og afar reynslumikill. Hann hefur keppt 33 sinnum og unnið 24 bardaga en tapað átta.

Pyle hefur reynt ýmislegt fyrir sér utan búrsins. Þar á meðal að komast inn í Hollywood.

Hann nældi sér í nokkuð stórt hlutverk í myndinni Universal Soldier: Regeneration þar sem hasarmyndahetjurnar Jean-Claude Van Damme og Dolph Lundgren fóru með aðalhlutverkin.

Þar lék hann captain Kevin Burke og þurfti að sýna bardagalistir sínar.

Hann fékk einnig lítið hlutverk í myndinni Men in Black III.