Suggs: Öll liðin í NFL-deildinni hata Patriots

Hinn grjótharði varnarmaður Baltimore Ravens, Terrell Suggs, hatar lið New England Patriots af lífi og sál og hann segist ekki vera einn um það.

Suggs kallaði leikmenn Patriots hrokafyllstu fífl í heiminum í vetur. Er Baltimore sló Patroits út úr úrslitakeppninni hellti hann svo bensíni á eldinn er hann sagði þeim að skemmta sér vel í Pro Bowl-leiknum.

"Ætla ég að biðjast afsökunar á þessum orðum? Ekki séns. Meinti ég það sem ég sagði? Algjörlega," sagði Suggs en hann vill meina að það sé almenn andúð í deildinni á liði Patriots.

"Ég get sagt það með fullri vissu að öll liðin í deildinni hata Patriots. Það er ýmislegt í gangi þar sem við vitum um. Við tölum saman. NFL-deildin er ekki það stór."