Poppstjarna í KR sendir frá sér nýtt lag

Knattspyrnukappinn Guðmundur Reynir Gunnarsson í KR hefur tekið upp nýtt lag. Lagið ber heitið I don't know.

Guðmundur Reynir, betur þekktur sem Mummi, sendi frá sér sína fyrstu plötu sumarið 2010. Platan hét Various Times in Johnny's Life en mesta athygli vakti lagið The Fire.

Mummi, sem varð bikarmeistari með KR síðastliðið sumar, hefur getið sér gott orð á fjölmörgum sviðum. Hann spilar á píanó sem skipar stórt hlutverk í lögum kappans og þá þykir Mummi góður dansari.

Mummi stundar nám í Hagfræði við Háskóla Íslands en þaðan fór hann í skiptinám til Bandaríkjanna síðasta vetur. Ekki ómerkari háskóli en Harvard varð fyrir valinu þar sem Mummi stóð sig afar vel.

Í viðtali árið 2010 var Mummi spurður út í fjölhæfni sína og hvort kalla mætti hann "fjölfræðing."

"Fjölfræðingur er áhugaverður titill en eins og staðan er í dag þá er ég fótboltamaður. Ég get alls ekki skilgreint mig sem poppstjörnu núna en það væri auðvitað gaman ef það væri hægt einhvern tímann í framtíðinni. Þá get ég kannski kallað mig fjölfræðing," sagði Mummi í viðtali við fótboltasíðuna Sammarinn.com.

Hægt er að hlusta á nýjasta lag Mumma í spilaranum hér fyrir ofan.