Ferguson: Ronaldo er nú fullmótaður knattspyrnumaður

Sir Alex Ferguson, stjóri Manchester United, telur að Cristiano Ronaldo sé nú orðinn fullmótaður knattspyrnumaður eftir að hann fór frá félaginu árið 2009.

Ronaldo er nú á mála hjá Real Madrid þar sem hann hefur sýnt listir sínar sem einn allra besti knattspyrnumaður heims.

Ferguson sá Real Madrid spila nýverið gegn Manchester City í Meistaradeild Evrópu og hreifst þá mjög af frammistöðu Ronaldo.

„Með þroskanum öðlast einstaklingurinn margt. Sumar þær ákvarðanir sem hann tók í sínum sendingum voru framúrskarandi. Þetta voru góðar einna snertingar sendingar og góðar fyrirgjafir," sagði Ferguson.

„Ég fylgdist með honum vaxa og dafna í þau sex ár sem hann var hjá okkur - og hann var frábær leikmaður. Nú er hann fullmótaður leikmaður."

„Hann er skynsamur, reyndur og þroskaður auk þess að vera afar hæfileikaríkur," sagði Ferguson en United og Real Madrid mætast í 16-liða úrslitum keppninnar.