Um sextíu þúsund sáu Svartur á leik

Svartur á leik í leikstjórn Óskars Þórs Axelssonar er vinsælasta íslenska kvikmyndin af þeim fimm sem voru frumsýndar árið 2012.

Alls sáu hana tæplega 63 þúsund manns í bíó, sem er næstum því jafnmikið og allar hinar til samans. Í öðru sæti er Djúpið í leikstjórn Baltasars Kormáks, sem tæplega 50 þúsund hafa séð, en sýningar á henni standa enn yfir. Næst á eftir kemur Ávaxtakarfan sem Sævar Guðmundsson leikstýrði. Um þrettán þúsund sáu þessa hressilegu barnamynd.

Í fjórða sætinu er spennutryllirinn Frost í leikstjórn Reynis Lyngdals sem aðeins rúmlega fimm þúsund manns sáu og í því fimmta og síðasta er hasarmyndin Blóðhefnd í leikstjórn Ingós Ingólfssonar sem afar fáir sáu, eða um fimm hundruð Íslendingar.

Vinsælasta erlenda myndin og um leið vinsælasta mynd ársins var Skyfall. Rúmlega 78 þúsund manns hafa séð þessa nýjustu Bond-mynd, sem enn er verið að sýna. Hún er jafnframt vinsælasta Bond-mynd sögunnar á Íslandi.

Í öðru sætinu er franska gamanmyndin Intouchables sem tæp 65 þúsund manns sáu og þar á eftir kemur Dark Knight Rises sem tæplega 64 þúsund manns sáu.

Hasarmyndin The Avengers er fjórða vinsælasta erlenda mynd ársins með rúmlega fimmtíu þúsund áhorfendur og um tuttugu þúsund færri sáu þá næstu, The Hunger Games.

Hin hálfíslenska Contraband, sem Baltasar Kormákur leikstýrði, naut einnig mikilla vinsælda. Tæp þrjátíu þúsund manns sáu hana, en Mark Wahlberg var í aðalhlutverki og Ólafur Darri Ólafsson í lítilli rullu. Það er svipaður fjöldi og sá upphaflegu myndina sem Contraband var gerð eftir, Reykjavík Rotterdam, eða tæplega 27 þúsund manns.

Samkvæmt upplýsingum frá Smáís, Samtökum myndrétthafa á Íslandi, er Contraband einnig í einu af fimm efstu sætunum yfir þær myndir sem mest hefur verið halað niður ólöglega á netinu í heiminum.- fb