Berthelsen leikur Pabbann

„Það er ekkert langt síðan hann varð faðir sjálfur þannig að hann tengdi virkilega við þessa sögu," segir Bjarni Haukur Þórsson, höfundur Pabbans.

Daninn Anders W. Berthelsen, sem er þekktur fyrir hlutverk sitt í sjónvarpsþáttunum Krónikunni, fer með hlutverk Pabbans í danskri uppfærslu einleiksins sem verður frumsýndur í Bellevue-leikhúsinu í Kaupmannahöfn 29. september.

Berthelsen er einn þekktasti leikari Danmerkur og hefur leikið í kvikmyndum á borð við Ítalska fyrir byrjendur og Superclasico. Spurður hvort það hafi ekki verið erfitt að næla í kappann segir Bjarni Haukur að það hafi tekið dálítinn tíma en það hafðist á endanum.

Pabbinn hefur verið sýndur víða um heim undanfarin ár. Í september bætast tvær nýjar borgir við, eða Madríd og Stokkhólmur, auk þess sem Ísrael og Ítalía eiga eftir að bætast í hópinn.

Annar einleikur úr smiðju Bjarna Hauks, Afinn, verður sýndur úti á landi í vor. „Við sýndum hann á Akranesi fyrir tveimur vikum og það gekk svakalega vel, þannig að við ákváðum að halda þessu áfram," segir hann. Um aðra helgi verður hann sýndur á Húsavík og eftir það verður hann settur upp á Akureyri, Selfossi, Vestmannaeyjum, Bolungarvík, Egilsstöðum og Ólafsvík. -fb