Samdi einlæga vísindaskáldsögu

"Það hefur aldrei verið skrifuð, svo ég muni eftir, einlæg og heiðarleg vísindaskáldsaga á Íslandi," segir Davíð Þór Jónsson.

Hann hefur sent frá sér vísindaskáldsöguna Orrustan um Fold. Hún gerist á tunglinu Fold þar sem lítil nýlenda manna hefur skotið rótum. Þegar undarlegar verur taka að herja á íbúana reynir á styrk þjóðarinnar.

"Það kom tímabil í sumar þar sem ég bjó einn úti á landi og hafði ekkert að gera á kvöldin og um helgar nema að spila tölvuleiki eða horfa á sumardagskrána í Ríkissjónvarpinu," segir Davíð Þór um tilurð bókarinnar.

"Það hafði blundað í mér löngun til að spreyta mig á skáldsögunni og ég ákvað að skrifa vísindaskáldsögu, bæði af því að ég hef gaman af svoleiðis bókum og svo er enginn að skrifa þannig bækur á Íslandi. Þetta er alvöru bókmenntategund sem íslenskir útgefendur hafa ekki tekið alvarlega."

Þegar Davíð Þór kynnti bókina fyrir íslenskum bókaforlögum fékk hann dræmar undirtektir. "Mér leið eins og þegar menn voru að skrifa glæpasögur fyrir tuttugu árum. Menn höfðu enga trú á þeim." Á endanum var það Helgi Jónsson hjá Tindi á Akureyri sem ákvað að gefa hana út. "Hann er hugrakkur og framsýnn útgefandi, ekki eins og vondu kapítalistarnir fyrir sunnan."

Davíð Þór, sem er fluttur til Þýskalands þar sem konan hans býr, hafði mjög gaman af skrifunum og langar að halda þeim áfram. "Þetta er eiginlega bókin sem mig langaði til að lesa eftir íslenskan rithöfund. Fyrst enginn var að skrifa hana ákvað ég að skrifa hana sjálfur."

- fb