Honda gæti snúið aftur í Formúluna

Japanski bílaframleiðandinn Honda heldur möguleikanum á endurkomu í Formúlu 1 opnum. Honda hætti í Formúlu 1 í miðju hruninu árið 2008. Ári síðar urðu leifar Honda-liðsins að heimsmeistrum.

Það má færa góð rök fyrir því að Honda hafi hætt ári of snemma því árangurinn sem hafði lengi látið á sér standa kom um leið og þeir drógu sig í hlé. Ástæðan fyrir brotthvarfi bílaframleiðandans var hins vegar að erfitt var að réttlæta miklar fjárfestingar þá.

Nú er hins vegar bjartari tíð framundan hjá Honda. Það er stjórnarmaður Honda og framkvæmdastjóri þróunardeildar fyrirtækisins sem stígur fram og segir að þetta sé í kortunum.

"Ég tala auðvitað ekki fyrir Honda heldur á persónulegum nótum þegar ég segi að ég elska mótorsport," segir Yoshiharu Yamamoto. "Það krefst mikilla skuldbindinga að taka þátt í Formúlu 1."

"Honda byrjar ekki alveg strax aftur en það er möguleiki að þetta gerist í framtíðinni ef reglubreytingar í F1 henta okkur."

Formúlan hagnast á aðkomu stóru framleiðandannaBernie Ecclestone, alráður í Formúlu 1, vill að öllum líkindum ólmur fá Honda aftur inn í Formúlu 1. Með stóru bílaframleiðendunum fylgir gríðarleg fjárfesting og mun meira ráðstöfunarfé en litlu liðin hafa á milli handanna.

Á tímabili um miðjan síðasta áratuginn kepptu Honda, Toyota, BMW, Ferrari og Ford gegn rótgrónum liðum eins og Williams, McLaren, Minardi og Jordan. Stóru framleiðendurnir drógu sig hins vegar flestir í hlé þegar árangurinn lét á sér standa eða þegar efnahagskerfi heimsins hrundi á hausmánuðum 2008.

Fleiri bílaframleiðendur hafa lýst áhuga á því að taka þátt í Formúlunni ef regluumhverfið breytist þeim til hagnaðar.

Þær reglubreytingar sem Yamamoto talar um að sé forsenda þess að Honda taki þátt á ný eru að öllum líkindum minni vélar, rafvæðing mótoranna eða frekari möguleikar á þróun lífræns eldsneytis. Þetta eru næstu vígstöðvar þróunarstríðsins milli bílaframleiðanda heimsins og Formúla 1 gæti reynst mikilvægur vettvangur til þróunar á þessum búnaði.

Ecclestone er hins vegar sagður efast um minnkun vélanna í nánustu framtíð. Ráðgert er að minnka þær árið 2014 og túrbó-drýfa þær en þær áætlanir gætu verið í hættu.