Webber stal ráspól af Vettel í Kóreu

Það var Mark Webber á Red Bull-bíl sem ók hraðast um Yeongam brautina í Kóreu í síðustu lotu tímatöku fyrir kappaksturinn þar. Hann stal ráspólnum af liðsfélaga sínum, heimsmeistaranum Sebastian Vettel, sem hafði verði lang fljótastur fyrstu tveimur lotum tímatökunnar.

Vettel ræsir annar í kappakstrinum á morgun og því eru báðir Red Bull-bílarnir fremstir. Lewis Hamilton mun ræsa þriðji í McLaren-bílnum á undan Fernando Alonso á Ferrari.

Það verður áhugavert að sjá hversu miklu af keppnishraða sínum Red Bull-liðið hefur fórnað til að hafa svona mikla yfirburði í tímatökunum. Ekki er víst að yfirburðirnir séu jafn miklir.

Alonso verður í dauðafæri til að bæta stöðu sína í brautinni í ræsingunni. Hann þarf helst að fá fleiri stig en Vettel vilji hann halda efsta sætinu í heimsmeistarakeppninni.

Kimi Raikkönen mun ræsa fimmti í Lotus-bílnum sínum. Hann hafði verið í bölvðum vandræðum með uppstllingu bílsins á æfingum og var enn kvartandi undan undirstýringu eftir aðra lotu tímatökunnar. Felipe Massa á Ferrari skilur Kimi frá liðsfélaga sínum, Romain Grosjean, sem ræsir í sjöunda sæti.

Nico Hulkenberg ók eina Force India-bílnum í lokalotunni. Hann náði áttunda besta tíma og var fljótari en Nico Rosberg og Michael Schumacher á Mercedes sem ræsa í níunda og tíunda sæti.

Jenson Button komst nokkuð óvænt ekki upp úr annari lotu tímatökunnar. Hann ræsir ellefti en er örugglega feginn að vera á eftir Romain Grosjean í ræsingunni. Grosjean hefur níu sinnum valdið slysi í fyrstu beygju og yfirleitt tekið einhverja með sér.

Þá ber að nefna Sauber-bílana og þá Sergio Perez og Kamui Kobayashi. Þeir áttu í örlitlum vandræðum og ræsa í tólfta og þrettánda sæti.

Rásröðin í kappakstrinum á morgun

Nr.	Ökumaður	Lið / Vél	Tími	Bil
1	Mark Webber	Red Bull/Renault	1'37.242	-
2	Sebastian Vettel	Red Bull/Renault	1'37.316	0.074
3	Lewis Hamilton	McLaren/Mercedes	1'37.469	0.227
4	Fernando Alonso	Ferrari	1'37.534	0.292
5	Kimi Räikkönen	Lotus/Renault	1'37.625	0.383
6	Felipe Massa	Ferrari	1'37.884	0.642
7	Romain Grosjean	Lotus/Renault	1'37.934	0.692
8	Nico Hülkenberg	Force India/Mercedes	1'38.266	1.024
9	Nico Rosberg	Mercedes	1'38.361	1.119
10	M.Schumacher	Mercedes	1'38.513	1.271
11	Jenson Button	McLaren/Mercedes	1'38.441	1.199
12	Sergio Pérez	Sauber/Ferrari	1'38.460	1.218
13	Kamui Kobayashi	Sauber/Ferrari	1'38.594	1.352
14	Paul Di Resta	Force India/Mercedes	1'38.643	1.401
15	Pastor Maldonado	Williams/Renault	1'38.725	1.483
16	Daniel Ricciardo	Toro Rosso/Ferrari	1'39.084	1.842
17	Jean-Eric Vergne	Toro Rosso/Ferrari	1'39.340	2.098
18	Bruno Senna	Williams/Renault	1'39.443	2.201
19	Vitaly Petrov	Caterham/Renault	1'40.207	2.965
20	H.Kovalainen	Caterham/Renault	1'40.333	3.091
21	Timo Glock	Marussia/Cosworth	1'41.371	4.129
22	Pedro de la Rosa	HRT/Cosworth	1'42.881	5.639
23	N.Karthikeyan	HRT/Cosworth	-	-
24	Charles Pic	Marussia/Cosworth	1'41.317	4.075