Vettel efstur í titilbaráttunni eftir sigur í Kóreu

Heimsmeistarinn ungi, Sebastian Vettel, á Red Bull-bíl í Formúlu 1 hafði yfirburði í kóreska kappakstrinum í dag og kom fyrstur í mark og tryggði sér forystu í heimsmeistarabaráttu ökuþóra. Vettel er í kjörstöðu þegar fjögur mót eru óekin.

Vettel kom í mark á undan liðsfélaga sínum Mark Webber. Þetta var þriðji sigur Vettels í röð en hann náði forystunni strax á fyrsta hring. Vettel var ekki ógnað eftir það.

Fernando Alonso skilaði Ferrari-bíl sínum heim í þriðja sætið. Það dugði hins vegar ekki til að halda forystu í stigabaráttunni sem var fyrir mótið fjögur stig. Alonso er nú sex stigum á eftir heimsmeistaranum unga.

Liðsfélagi Alonso hjá Ferrari, Felipe Massa, varð fjórði á undan Kimi Raikkönen hjá Lotus. Massa var á fljúgandi siglingu í keppninni og sótti á Alonso. Hann fékk þó skilaboð um að halda sinni stöðu og eyðileggja ekki fyrir Alonso. Romain Grosjean, einnig hjá Lotus, varð sjöundi og olli ekki usla í ræsingunni eins og margir höfðu veðjað á.

McLaren-bílarnir voru í mesta basli. Jenson Button féll úr leik strax í byrjun og Lewis Hamilton lauk kappakstrinum í tíunda sæti og sótti síðasta stigið í boði. Margir höfðu trúað að McLaren-liðið myndi veita Red Bull hörðustu samkeppnina um heimsmeistratitilinn en það hefur ekki orðið raunin.

Nico Hulkenberg hjá Force India ók frábærlega og skilaði bílnum heim í sjötta sæti. Toro Rosso-ökumennirnir, Jean-Eric Vergne og Daniel Ricciardo, voru einnig í miklu stuði og kláruðu í áttunda og níunda sæti.

Næst verður keppt á Indlandi eftir tvær vikur.

Úrslit mótsins í Kóreu

Nr.	Ökumaður	Bíll / Vél	Hringir	Tími	Bið
1	Sebastian Vettel	Red Bull/Renault	55	1:36'28.651
2	Mark Webber	Red Bull/Renault	55	1:36'36.882	8.231
3	Fernando Alonso	Ferrari	55	1:36'42.595	13.944
4	Felipe Massa	Ferrari	55	1:36'48.819	20.168
5	Kimi Räikkönen	Lotus/Renault	55	1:37'05.390	36.739
6	Nico Hülkenberg	Force India/Mercedes	55	1:37'13.952	45.301
7	Romain Grosjean	Lotus/Renault	55	1:37'23.463	54.812
8	Jean-Eric Vergne	Toro Rosso/Ferrari	55	1:37'38.240	1'09.589
9	Daniel Ricciardo	Toro Rosso/Ferrari	55	1:37'40.438	1'11.787
10	Lewis Hamilton	McLaren/Mercedes	55	1:37'48.343	1'19.692
11	Sergio Pérez	Sauber/Ferrari	55	1:37'48.713	1'20.062
12	Paul Di Resta	Force India/Mercedes	55	1:37'53.099	1'24.448
13	M.Schumacher	Mercedes	55	1:37'57.892	1'29.241
14	Pastor Maldonado	Williams/Renault	55	1:38'03.575	1'34.924
15	Bruno Senna	Williams/Renault	55	1:38'05.553	1'36.902
16	Vitaly Petrov	Caterham/Renault	54	1:37'31.417	1 Lap
17	H.Kovalainen	Caterham/Renault	54	1:37'42.137	1 Lap
18	Timo Glock	Marussia/Cosworth	54	1:37'52.750	1 Lap
19	Charles Pic	Marussia/Cosworth	53	1:36'31.365	2 Laps
20	N.Karthikeyan	HRT/Cosworth	53	1:37'51.910	2 Laps
	Pedro de la Rosa	HRT/Cosworth	16	29'49.468
	Kamui Kobayashi	Sauber/Ferrari	16	30'47.332
	Nico Rosberg	Mercedes	1	1'58.108
	Jenson Button	McLaren/Mercedes	0