Button refsað í Japan

McLaren-ökuþórinn Jenson Button mun ræsa fimm sætum aftar í japanska kappakstrinum um næstu helgi en tími hans í tímatökum segir til um. McLaren þurfti að skipta um gírkassa í bíl Buttons og er honum því refsað.

Button er talinn sigurstranglegur í Japan. McLaren-bíllinn er augljóslega fljótasti bíllinn í augnablikinu og Button vann japanska kappaksturinn í fyrra.

Bilunin er af sama meiði og bilunin sem kom upp í gírkassanum hjá liðsfélaga Buttons, Lewis Hamilton, í Singapúr. "Rannsókn eftir bilunina í Singapúr leiddi bilun í bíl Jenson í ljós," sagði Paddy Lowe, tæknistjóri McLaren-liðsins.

Fernando Alonso er 75 stigum á undan Button í heimsmeistarakeppninni og verða möguleikar Buttons á heimsmeistaratitlinum að teljast nokkuð litlir úr þessu. Hamilton á þó aðeins meiri séns enda 52 stigum á eftir Alonso.