Sergio Ramos: Veit ekki hvort að Mourinho var að refsa mér

Sergio Ramos vildi lítið tjá sig um samband sitt við knattspyrnustjórann Jose Mourinho hjá Real Madrid. Ramos sagðist þó ætla að halda áfram að gefa allt sitt fyrir félagið.

Ramos var ekki í byrjunarliði Real Madrid gegn Manchester City í Meistaradeild Evrópu í síðustu viku. Rafael Varane tók þess í stað stöðu hans í varnarlínu Real.

Spænskir fjömliðlar héldu því fram að með þessu hefði Mourinho verið að refsa Ramos af einhverjum ástæðum.

„Ég veit ekki hvort að hann hafi verið að refsa mér með því að setja mig á bekkinn," sagði Ramos sem var í byrjunarliði Real gegn Rayo Vallecano í gær. Real vann leikinn, 2-0. „Þetta er eitthvað sem þjálfarinn ákveður."

„Ég ætla ekki að tjá mig um það sem gerist innan félagsins. Ég vil halda áfram að hjálpa liðinu og gera allt sem ég get til þess. Allir vilja spila og ég er ánægður með að hafa fengið að spila gegn Rayo."