Mourinho vill vera eins og Sir Alex

Portúgalski þjálfarinn Jose Mourinho hjá Real Madrid lítur mikið upp til Sir Alex Ferguson, stjóra Man. Utd, og vonast til þess að vera eins lengi í bransanum og Skotinn.

Mourinho er að verða fimmtugur og draumur hans er að vera toppþjálfari næstu 20 árin.

"Ég skil fullkomlega af hverju Alex er enn að vinna þó svo hann sé orðinn sjötugur. Ég held að ég verði alveg eins," sagði Mourinho.

"Ég elska að þjálfa og tel mig eiga mikið eftir þó svo ég sé að verða fimmtugur. Ég er mjög stoltur af því sem ég hef gert fyrir fimmtugt og stefni að því að afreka enn meira á komandi árum."