Mourinho hefur áhyggjur af hugarfari leikmanna

Portúgalinn Jose Mourinho, þjálfari Real Madrid, er eðlilega vonsvikinn með gengi síns liðs í upphafi leiktíðar og hann hefur áhyggjur af hugarfari leikmanna.

Real Madrid tapaði gegn Sevilla í gær og er þegar lent átta stigum á eftir Barcelona í spænsku deildinni.

"Við höfum í rauninni aðeins spilað vel í spænska ofurbikarnum. Ég hef áhyggjur af því núna að ég sé ekki með lið í höndunum. Það eru afar fáir leikmenn sem eru einbeittir og með hausinn í lagi," sagði Mourinho svekktur.

"Þegar leikmenn eru ekki að gefa sig alla fyrir málstaðinn þá er staðan erfið. Ég er þjálfarinn og ef leikmenn eru ekki með hausinn á réttum stað þá er það mér að kenna."

Real Madrid spilar við Man. City í Meistaradeildinni á þriðjudag.