Ronaldo fagnaði ekki mörkunum | Óánægður hjá Real Madrid

Cristiano Ronaldo, leikmaður Real Madrid, kom öllum á óvart með svörum sínum á blaðamannafundi eftir sigur félagsins, 3-0, á Granada í spænsku úrvalsdeildinni í knattspyrnu en leikmaðurinn gerði tvö marka Real Madrid í leiknum.

Leikmaðurinn hefur nú skorað 150 mörk í 149 leikjum fyrir spænsku meistarana en hann virðist ekki vera sáttur hjá liðinu. Ronaldo fagnaði ekki í kvöld þegar hann skoraði mörkin og virtist vera nokkuð pirraður inná vellinum.

„Ég fagnaði ekki mörkunum í kvöld af þeirri ástæðu að ég er ekki ánægður hjá félaginu eins og staðan er í dag," sagði Ronaldo við blaðamenn eftir leikinn.

„Stjórnarmenn og aðrir tengdir félaginu vita ástæðuna og það er það eina sem ég hef um málið að segja að svo stöddu. Núna ætla ég að einbeita mér að landsliðinu, það er mikilvægur leikur framundan hjá Portúgal."

Hér að ofan má sjá öll mörk leiksins í kvöld og einnig hvernig Ronaldo brást við þegar hann kom boltanum í netið.