Ronaldo með tvö í fyrsta sigri Real Madrid

Cristiano Ronaldo skoraði tvívegis fyrir Real Madrid í 3-0 heimasigri á Granada í efstu deild spænsku knattspyrnunnar í kvöld.

Ronaldo kom heimamönnum á bragðið um miðjan fyrri hálfleikinn og lærisveinar Jose Mourinho leiddu í hálfleik 1-0. Spænsku meistararnir komust einnig yfir í fyrstu tveimur leikjum tímabilsins en misstu þá forystu niður. Það gerðist ekki í kvöld.

Ronaldo var aftur á ferðinni snemma í síðari hálfleik áður en Argentínumaðurinn Gonzalo Higuain gerði út um leikinn með marki stundarfjórðungi fyrir leikslok.

Sigurinn var sá fyrsti hjá Real Madrid í deildinni á leiktíðinni en liðið hafði aðeins fengið eitt stig úr fyrstu tveimur leikjum sínum.