Aron meiddist í tapi AGF í Evrópudeildinni

Aron Jóhannsson fór meiddur af leikvelli á 43. mínútu í 3-1 tapi AGF gegn Dila í síðari viðureign liðanna í 2. umferð forkeppni Evrópudeildar en leikið var í Georgíu.

AGF, sem tapaði fyrri leiknum í Danmörku 2-1, komst yfir á 34. mínútu og var í fyrstu talið að markið yrði skráð á Aron. Dómari leiksins hefur hins vegar skráð markið sem sjálfsmark markvarðar Georgíuliðsins.

Heimamenn skoruðu hins vegar þrjú mörk í síðari hálfleik og tryggðu sér 3-1 sigur og 5-2 sigur samanlagt í leikjunum tveimur.