Raikkönen hefur fundið það sem vantaði

Kimi Raikkönen, ökumaður Lotus-liðsins í Formúlu 1 segist nú hafa fundið það sem uppá vantaði svo að hann gæti kreist það besta úr bíl sínum. Kimi hefur staðið sig vel það sem af er tímabilinu og staðið þrisvar sinnum á verðlaunapalli.

Hann hefur þó alltaf sagt að hann hefði getað gert betur ef hann hefði fundið þann herslumun sem hann talar um að hafa fundið nú.

„Maður lærir alltaf á bílinn þegar líður á og getur þá sett hann upp eins og maður vill," sagði Raikkönen sem hefur kvartað undan mörgu í Lotus-bílnum í sumar, þá helst aflstýrinu og tengdum hltum.

„Í síðustu mótum höfum við verið að braggast. Við vorum nokkuð ósátt með upphaf tímabilsins – eða við vorum ánægð en ég fann fyrir því að eitthvað vantaði, svo fundum við ástæður fyrir því að vera óánægð."

Kimi segir lið sitt hafa fundið vandamálið í síðasta kappakstri og vonar að það sé hægt að laga. Spurður hvort vandamálið tengist Pirelli-dekkjunum sagði hann: „Nei, það snýst meira um að ég fái að aka bílnum eins og ég vil."

Raikkönen var annar á seinni æfingu dagsins en er hógvær þegar kemur að möguleikum hans í tímatökum á morgun og í keppninni á sunnudag. „Við vitum í raun ekki hvort við verðum fljótir á morgun því við höfum ekki hugmynd um hvað hin liðin voru að gera í dag."