Apple endurbætir nýjasta iPad

Talið er að tæknirisinn Apple undirbúi nú endurbætta útgáfu af þriðju kynslóð iPad spjaldtölvunnar sem nýlega kom á markað. Notendur hafa margir kvartað yfir því að tækið hitni afar mikið og nú leitast Apple við að lækka hitamyndunina.

Það er tæknifréttasíðan TechCrunch sem greinir frá þessu.

Samkvæmt heimildum síðunnar er Appe nú að endurskoða rafhlöðu spjaldtölvunnar sem og LCD baklýsingu hennar. Þá verður endurbætta útgáfan þynnri en núverandi útgáfa.

Sérfræðingar síðunnar gera ráð fyrir að Apple muni kynna endurbættu spjaldtölvuna til leiks í fjórða ársfjórðungi þessa árs eða á sama tíma og minni og ódýrari útgáfa iPad spjaldtölvunnar verður opinberuð.