Dekkin gera leikinn lotterí

Eigandi Red Bull orkudrykkjaframleiðandans, Dietrich Mateschitz, segir frábært upphaf Formúlu 1 vertíðarinnar hafa snúið keppninni upp í lotterí fyrir liðin. Umdeild Pirelli-dekkin eru þar helsti áhrifavaldur.

Fimm ökuþórar hjá fimm mismunandi liðum hafa sigrað í fyrstu fimm mótum ársins. En þó Mateschitz gerir sér grein fyrir því að jöfn keppni sé frábær fyrir áhugmenn þá finnst honum dekkin gera leikinn heldur ósanngjarnan.

„Augljóslega hafa reglubreytingarnar breytt hlutunum á undirbúningstímabilinu og liðin eru jafnari sem aldrei fyrr," sagði Matesichitz. „En allir virðast þurfa að læra upp á nýtt hvernig vinna á keppnir. Þetta er orðið einskonar lotterí."

„Ég held að enginn skilji hvernig dekkin virka." Hann segir þó að Lotus-liðið sé að koma sér á óvart með frammistöðu sinni í ár. Þar hefur Kimi Raikkönen farið fremstur í flokki. „Ég trúði því að Kimi hafi haft hraða til að vinna mótið í Barein. Spurningin er bara sú hvort það sé liðinu mögulegt að halda í við tækniframarir annarra liða."

Kimi deilir ekki skoðun Matesichitz á dekkjunum. Hann segir að of mikið veður hafi verið gert úr áhrifum dekkjana á röðun ökumanna í mótum ársins.

„Ég held að eðli Formúlu 1 sé ekki öðruvísi vegna dekkjanna," sagði Kimi.