Óvissa magnast um mótið í Barein vegna pólitískrar ólgu

Bernie Ecclestone, alráður í Formúlu 1, hefur sagt að hann og mótshaldarar geti ekki þvingað liðin til að mæta og keppa í Barein þann 22. apríl næstkomandi.

Óvissa um mótið í Barein hefur magnast eftir því sem nær dregur mótsdegi. Enn fleiri raddir kalla nú eftir frestun mótsins í ár. Stjórnvöldum í landinu hefur ekki tekist að kveða niður mótmælin í landinu sem nú hafa staðið í nær eitt og hálft ár.

"Ef liðin vilja ekki fara, þá getum við ekki þvingað þau." Sagði Ecclestone. Víst er að umræðan um Barein kappaksturinn mun heltaka keppnishelgina í Kína um næstu helgi.

Aðeins stjórnvöld í Barein eða FIA, alþjóðakappaksturssambandið, geta frestað eða aflýst mótinu.

Í fyrra var Formúlu 1 kappakstrinum í Barein frestað og að lokum aflýst vegna óeirða í landinu. Var það gert til að hlífa keppnisliðum og erlendum gestum vegna hættu um að mótmælendur myndu nýta sér athygli alheimsins á Formúlu 1.

Almenningur í landinu er gríðarlega ósátt með stjórnarfarið þar og hefur kallað eftir meira lýðræði sem konungsstjórnin hefur ekki enn veitt. Mótmælin standa enn og nú síðast á mánudag sprakk sprengja í höfuðborginni Manama í smáríkinu við Persaflóa, aðeins nokkrum kílómetrum frá kappakstursbrautinni.

Yfirvöld í Barein hafa sagt að öll mótmæli sem hafa áhrif á Formúlu 1 kappaksturinn muni vera kveðin niður með valdi. "Friðsæl mótmæli verða leyfð," segir John Yates, breskur starfsmaður innanríkisráðuneytisins í Barein. "En við getum ekki leyft vegatálma sem takmarkar umferð að kappakstursbrautinni."

"Ef einhver kemst inn á brautina, hversu heimskulegt sem það kann að hljóma, mun það stefna honum, ökumönnunum og jafnvel áhorfendum í bráða hættu. Við getum ekki leyft það."

Mótshaldarar í Barein vilja endilega að mótið fari fram og saka "sófaspekinga" og "hræðsluáróður" um að sýkja orðspor keppninnar og heilindi mótshaldara.

"Þeir sem halda að hér sé ekki hægt að keppa hafa einfaldlega ekki kannað stöðuna nægilega vel," sagði Zayed Al Zayani, yfirmaður Barein kappakstursins. "Þeir eyðileggja fyrir hlutlausum aðilum sem hafa sjálfir kannað stöðuna."