Loksins kom að því að Federer tapaði

Eftir að hafa unnið sextán leiki í röð á þessu ári kom að því að Roger Federer tapaði tennisleik. Það var Andy Roddick sem stöðvaði hann á Miami Masters í þrem settum.

"Ég var alveg flatur í dag. Líklega var ég svolítið þreyttur," sagði Federer sem var aðeins að tapa fyrir Roddick í þriðja sinn í 24 leikjum.

"Það er búið að vera mikið álag á mér upp á síðkastið og ég finn fyrir því núna," sagði Federer sem er búinn að vinna þrjú tennismót á þessu ári.

Besti tenniskappi heims um þessar mundir, Serbinn Novak Djokovic, er aftur á móti kominn í fjórðu umferð mótsins eftir léttan sigur á landa sínum, Victor Troicki. Djoko mætir Richard Gasquet í sextán manna úrslitunum.