Sir Alex Ferguson: Við getum ekki kvartað

Sir Alex Ferguson, stjóri Manchester United, þurfti að horfa upp á sína menn tapa þriðja Evrópuleiknum í röð í kvöld og falla út með sannfærandi hætti á móti spænska liðinu Athletic Bilbao sem yfirspilaði Manchester United lengstum í leikjunum tveimur.

„Ég held að við getum ekki kvartað. Þeir fengu ódýrt mark í fyrri hálfleik sem kom þeim í góða stöðu. Ég átti erfitt með að trúa því að við gætum fengið á okkar svona mark. Þetta var mjög lélegt," sagði Sir Alex Ferguson um fyrra mark Athletic Bilbao sem Fernando Llorente skoraði.

„Við stóðum okkur vel í fyrri hálfleiknum en þeir byrjuðu seinni hálfleikinn af miklum krafti," sagði Ferguson en United hefði getað verið búið að fá sig annað markið löngu áður en Bilbao-liðið komst í 2-0.

„Það er enginn léttir að vera fallin úr leik. Það voru mestu vonbrigðin að falla út úr Meistaradeildinni en núna erum við dottnir út úr Evrópudeildinni líka," sagði Ferguson.