McLaren-menn fremstir í tímatökum

Lewis Hamilton ræsir fremstur í ástralska kappakstrinum í Melbourne á morgun. Liðsfélagi hans Jenson Button verður annar. Roman Grosjean á Lotus ræsir þriðji. Yfirráðum Red Bull í tímatökum er lokið.

Sebastian Vettel náði aðeins sjötta besta tíma. Vettel einokaði tímatökurnar í fyrra. Liðsfélagi hans Mark Webber var fljótari og ræsir fimmti. Þetta er versti árangur Vettels í tímatökum síðan 2010.

Roman Grosjean á Lotus náði stórglæsilegum árangri og neitaði Michael Schumacher um þriðja sætið í tímatökunum. Kimi Raikkönen, liðsfélagi Grosjean, komst ekki upp úr fyrstu umferð tímatökunnar eftir að hafa gert mistök í beygju 12.

Mercedes bíllinn var eldfljótur í tímatökunum. Schumacher og Nico Rosberg munu ræsa í fjórða og sjöunda sæti á ráslínunni.

Fernando Alonso gerði einnig mistök, endaði í malargryfjunni og komst ekki upp úr annari umferð tímatökunnar. Hann ræsir í 12. sæti. Felipe Massa, liðsfélagi Alonso hjá Ferrari, átti aldrei séns og endaði í 16. sæti.

Rásöðin á morgun

Nr.	Ökuþór	Lið
1	Hamilton	McLaren
2	Button	McLaren
3	Grosjean	Lotus
4	Schumacher	Mercedes
5	Webber	Red Bull
6	Vettel	Red Bull
7	Rosberg	Mercedes
8	Maldonado	Williams
9	Hulkenberg	Force India
10	Ricciardo	Toro Rosso
11	Vergne	Toro Rosso
12	Alonso	Ferrari
13	Kobayashi	Sauber
14	Senna	Williams
15	di Resta	Force India
16	Massa	Ferrari
17	Perez	Sauber
18	Raikkönen	Lotus
19	Kovalainen	Caterham
20	Petrov	Caterham
21	Glock	Marussia
22	Pic	Marussia
-	de la Rosa	HRT
-	Karthikeyan	HRT