Jenson Button: Liðin of jöfn til að skera úr um yfirburði

Jenson Button, ökumaður McLaren liðsins telur að Sebastian Vettel muni ekki hafa eins mikla yfirburði og hann hafði í fyrra.

"Vettel er auðvitað líklegastur til vinnings," sagði Button á æfingum í Barcelona í dag. "Red Bull liðið verður örugglega mjög sterkt frá fyrsta móti en ég held að þeir muni ekki hafa sama forskot og þeir höfðu í fyrra."

"Við [McLaren] erum búin að aka mikið hér í Barcelona, leggja okkur fram við að skilja nýju Pirelli dekkin og fá bílinn til að fara betur með þau. Það eru mörg lið mjög samkeppnishæf núna svo við höldum ótrauð áfram."

Æfingar liðanna héldu áfram í Barcelona í dag. Pastor Maldonado á Williams átti besta hringtíma dagsins, Schumacher var annar og Kamui Kobayashi þriðji. Liðin héldu áfram að einbeita sér að akstursþoli bílanna í dag og markmiðið því ekki að setja hraðasta hring.

Síðasti dagur æfingalotunnar er á morgun og er útlit fyrir að liðið haldi áfram að þreifa fyrir sér hvað varðar áreiðanleika bílanna.