Apple boðar til blaðamannafundar í næstu viku

Apple hefur boðað til blaðamannafundar í San Francisco í næstu viku. Öruggt þykir að tæknifyrirtækið muni afhjúpa iPad 3 spjaldtölvuna á fundinum.

Fyrirtækið hefur ekki staðfest að spjaldtölvan nýja verði kynnt en yfirskrift fundarins bendir þó til þess: „We have something you really have to see. And touch."

Á boðskorti fundarins er síðan mynd af fingri sem þrýstir á iPad spjaldtölvu.

Apple uppfærir helstu vörur sínar einu sinni á ári. iPad 2 spjaldtölvan var kynnt í mars á síðasta ári og var hún komin í almenna sölu nokkrum vikum seinna.