Aníta sigraði með yfirburðum í 800 m hlaupi

Aníta Hinriksdóttir, ung hlaupakona úr ÍR, sigraði með miklum yfirburðum í 800 m hlaupi kvenna á meistaramóti Íslands í frjálsum íþróttum sem nú fer fram í Laugardalshöllinni.

Aníta kom í mark á 2:07,86 mínútum og var tæpum tveimur sekúndum frá eigin Íslandsmeti sem hún setti á Reykjavíkurleikunum í síðasta mánuði. Yfirburðir hennar í greininni eru ótvíræðir en næsti keppandi kom í mark rúmum sautján sekúndum á eftir.

Aníta er aðeins á sextánda aldursári og því ein allra efnilegasta íþróttakona landsins.

Mikil spenna var í 800 m hlaupi karla en svo fór að Íslandsmethafinn, Björn Margeirsson úr UMSS, hafði sigur úr býtum. Hann kom í mark á 1:53,29 mínútum og var um hálfri sekúndu á undan Snorra Sigurðssyni úr ÍR.