Adele fékk flest verðlaun en McCartney mestan pening

Þó hin breska Adele hafi fengið flest verðlaun á 54. Grammy-verðlaunahátíðinni á dögunum, sex talsins, þá var hún ekki sá tónlistarmaður sem var með hæstar tekjur á síðasta ári.

Samkvæmt lista Forbes var það Bítillinn Paul McCartney sem var tekjuhæstur með 67 milljónir dollara í laun, eða sem nemur 8,2 milljörðum króna. Á eftir honum í röðinni koma kántrýtónlistarkonan Taylor Swift með 45 milljónir dollara, 5,5 milljarða króna. Þriðji hæstlaunaði tónlistarmaðurinn í fyrra var Jay Z með 35 milljónir dollara, rétt um 4,3 milljörðum króna.