Ótrúlegar hagnaðartölur Apple

Hugbúnaðarrisinn Apple hagnaðist um 13,6 milljarða dollara, eða sem nemur tæplega 1.700 milljörðum króna, á síðustu þremur mánuðum síðasta árs. Hagnaðurinn hækkaði um 118% samanborið við sama tímabil árið 2010.

Hagnaðurinn nemur meira en árlegri landsframleiðslu Íslands, en hún er rúmlega 1.500 milljarðar króna.

Um methagnað er að ræða og þykja hagnaðartölurnar ótrúlegar, að því er segir á vefsíðu breska ríkisútvarpsins BBC.

Tim Cook, forstjóri Apple, segir í tilkynningu vegna uppgjörsins að tölurnar sýni gríðarlega sterka stöðu Apple. „Það eru nýjar og spennandi vörur á leiðinni sem við hlökkum til þess að byrja selja," sagði Cook.