Keflvíkingar skutu Stólanna niður á jörðina | Magnús og Valur heitir í Síkinu

Keflavík fór illa með Tindastól í 14. umferð Iceland Express deildar karla í körfubolta í Síkinu í kvöld. Keflavík fór á Krókinn, vann 19 stiga sigur, 91-72 og fylgir Stjörnunni í baráttunni um annað sætið.

Tindastóll var búið að vinna 9 af 10 leikjum í öllum keppnum en Stólarnir áttu engin svör á móti frískum Keflvíkingum þar sem þeir Magnús Þór Gunnarsson og Valur Valsson fóru á kostum. Magnús skoraði 25 stig og Valur var með 20 stig en saman voru þeir með tíu þriggja stiga körfur.

Bandarísku leikmenn Keflvíkinga, Jarryd Cole og Charles Michael Parker, komust því upp með það að skora aðeins 24 stig saman í kvöld. Friðrik Hreinsson og Maurice Miller voru stigahæstir hjá Tindastól með 15 stig hvor.

Keflvíkingar byrjuðu vel og komust í 8-2 eftir aðeins tveggja mínútna leik. Tindastóll jafnaði leikinn strax í 8-8 og náði í kjölfarið frumkvæðinu. Keflavík skoraði fimm síðustu stigin í fyrsta leikhluta og var því með 25-20 forystu eftir hann.

Keflvíkingar unnu síðan fyrstu fjórar mínútur annars leikhlutans 14-4 og munurinn var allt í einu orðinn fimmtán stig, 39-24, Keflavík í hag. Magnús Þór Gunnarsson var þarna kominn með 16 stig fyrir Keflavík.

Keflavík var síðan með sextán stiga forskot í hálfleik, 50-34, eftir að hafa unnið annan leikhlutann 25-14. Magnús Þór var með 19 stig og 5 þrista í fyrri hálfleiknum og hinn ungi Valur Valsson skoraði 10 stig.

Keflvíkingar skoruðu átta fyrstu stig seinni hálfleiksins, komust í 58-34 og leikurinn var nánast búinn. Magnús og Valur settu báðir niður þrist á þessum kafla og voru því búnir að skora 35 stig saman eða einu stigi meira en Stólarnir.

Sigur Keflavíkur var aldrei í hættu eftir þetta en í lokin munaði 19 stigum á liðunum.



Tindastóll-Keflavík 72-91 (20-25, 14-25, 8-21, 30-20)

Tindastóll: Maurice Miller 15, Friðrik Hreinsson 15/6 stoðsendingar, Svavar Atli Birgisson 14/4 fráköst, Curtis Allen 8/6 fráköst/6 stolnir, Loftur Páll Eiríksson 6, Helgi Rafn Viggósson 6/5 fráköst, Þröstur Leó Jóhannsson 5/4 fráköst, Ingvi Rafn Ingvarsson 2/5 fráköst, Helgi Freyr Margeirsson 1.

Keflavík: Magnús Þór Gunnarsson 25/10 fráköst, Valur Orri Valsson 20, Jarryd Cole 15/9 fráköst, Halldór Örn Halldórsson 14/8 fráköst, Charles Michael Parker 9/9 fráköst/5 stoðsendingar, Almar Stefán Guðbrandsson 6/4 fráköst, Kristoffer Douse 2.