Kaka, Özil og Ronaldo á skotskónum í sigri Real Madrid

Real Madrid hélt sigurgöngu sinni áfram í spænsku deildinni í knattspyrnu með 3-1 sigri á Real Zaragoza á Bernabeu í Madrid í kvöld.

Heimamenn lentu undir snemma leiks þegar Angel Lafita skoraði. Brasilíumaðurinn Kaka jafnaði metin eftir rúman hálftíma og staðan jöfn í hálfleik.

Í síðari hálfleik réðu heimamenn gangi mála. Cristiano Ronaldo kom Madrid yfir eftir nokkurra mínútna leik og Þjóðverjinn Mesut Özil tryggði heimamönnum 3-1 sigur skömmu síðar.

Madrid hefur átta stiga forskot á toppi La Liga en Barcelona, sem er í öðru sæti, sækir Villarreal heim í síðari leik kvöldsins.