Emil með sigurkörfuna í Stjörnuleiknum - Höfuðborgarsvæðið vann

Emil Þór Jóhannsson, leikmaður KR, tryggði liði Höfuðborgarsvæðsins 142-140 sigur á Landsbyggðarliðinu í Stjörnuleik KKÍ sem fram fór í Dalhúsum í Grafarvogi í dag. Heimamaðurinn Nathan Walkup var valinn besti leikmaður vallarins en þetta kom fram á heimasíðu KKÍ.

Það var jafnt á öllum tölum allan leikinn og spennuþrungnar lokamínútur. Emil Þór Jóhannsson setti síðustu stig leiksins þegar hann negldi þrist úr horninu og kom Höfuðborgarsvæðinu yfir 142-140 og reyndust það lokatölur leiksins.

Stigahæstur í liði Höfuðborgarsvæðisins var Hayward Fain úr Haukum með 22 stig og næstur honum var Nathan Walkup úr Fjölnimeð 20 stig.

Stighæsti leikmaður Landsbyggðarinnar var Darrin Govens með 41 stig og Quincy Hankins-Cole setti 18 stig.

Nathan Walkup leikmaður Fjölnis var valinn besti maður leiksins en hann setti 20 stig, tók sjö fráköst og gaf þrjár stoðsendingar.