Stjórn Amagerbanken kærð til lögreglunnar

Jens Hintze, hluthafi í Amagerbanken, hefur kært stjórn bankans til lögreglunnar. Hintze tapaði rúmlega 127.000 dönskum kr. eða um 2,7 milljón kr. á gjaldþroti Amagerbanken.

Fjallað er um málið á flestum viðskiptasíðum danskra fjölmiðla í morgun. Þar segir að Hintze hafi ákært bæði stjórnformann og bankastjóra Amagerbanken fyrir brot á upplýsingaskyldu til hluthafa bankans.

Hintze telur að viðskipti með hluti í bankanum í kauphöllinni á tímabilinu 25. nóvember til 4. febrúar hafi verið gerð á fölskum forsendum þar sem staða bankans var mun verri en hin nýja stjórn vildi vera láta.

Steen Hove bankastjóri Amagerbanken vísar þessu á bug og segir að stjórn bankans hafi farið eftir lögum og reglum. „Gildandi reglur voru virtar en ég ætla ekki að taka til varna í fjölmiðlum," segir Hove í samtali við Börsen og bætir því við að hann telji ákæruna bera vott um örvæntingu. „Ég vísa því algerlega á bug að það hafi verið vandamál með upplýsingagjöfina," segir Hove.