Adebayor hæstánægður með sitt fyrsta mark

Emmanuel Adebayor er afar ánægður með að hafa skorað sitt fyrsta mark með Real Madrid er félagið vann 2-0 sigur á Sevilla í spænsku bikarkeppninni í gær.

Adebayor spilaði síðustu tíu mínútur leiksins og skoraði síðara mark Real en liðið tryggði sér þar með sæti í úrslitaleik keppninnar gegn Barcelona þann 20. apríl næstkomandi.

„Þetta var sérstakur leikur fyrir mig," sagði Adebayor. „Ég elska þetta félag og hef alltaf dreymt um að fá að spila hér."

„Mér tókst að skora í frumraun minni hér á Santiago Bernabeu og er því mjög ánægður."

„Nú mætum við einu besta liði heims í úrslitunum en það er enn langt í leikinn og þurfum við að einbeita okkur að deildinni þangað til."

Liðin mættust síðast í úrslitaleik spænsku bikarkeppninnar árið 1990 en þá höfðu Börsungar betur, 2-0.