Strangari fjárlagareglur í ESB

Fjármálaráðherrar Evrópusambandsins hafa komist að sameiginlegri niðurstöðu um strangari reglur um ríkisfjárlög. Þær gera Evrópusambandinu meðal annars auðveldara að samþykkja refsiaðgerðir á hendur þeim ríkjum sem brjóta þessar reglur.

Jasek Ratovski, fjármálaráðherra Póllands, sagði að samkomulag um þetta hefði náðst á fundi ráðherranna í Póllandi í gær.

Fjármálaráðherra evrusvæðisins hafa síðan frestað ákvörðun um næstu greiðslu úr neyðarsjóði sínum til Grikklands, þrátt fyrir mikinn þrýsting, ekki síst frá Tim Geithner, fjármálaráðherra Bandaríkjanna, um að hraða öllum ákvörðunum um lausnir á skuldavanda Grikkja.

Evrópsku fjármálaráðherrarnir vilja að Grikkir sýni fyrst fram á að þeir muni standa við aðhaldsaðgerðir, sem duga þeim ásamt fjárhagsaðstoðinni til að greiða afborganir af skuldum sínum.

Verulegur ágreiningur hefur verið innan Evrópusambandsins um það hvaða leiðir eigi að fara til að bjarga Grikkjum úr skuldavandanum.

Angela Merkel Þýskalandskanslari stendur enn hörð á því að Grikkland og önnur stórskuldug Evrópuríki þurfi sjálf að bera ábyrgð á eigin vandamálum. Eina leiðin til að hjálpa þeim sé að veita þeim neyðarlán svo þau geti greitt afborganir sínar á réttum tíma.- gb