Engar undankeppnir í Eurovision

„Við viljum gefa þjóðinni tækifæri til að segja hvaða lagahöfunda hún vill fá," segir Þórhallur Gunnarsson. Landsmönnum gefst í fyrsta skipti kostur á því að tilnefna þann tónlistarmann sem þeir vilja sjá í Söngvakeppni Sjónvarpsins en Þórhallur fer fyrir nefnd sem er að endurskoða hana.

Fyrirkomulagið á keppninni í ár verður breytt. Ekki verður kosið á milli laganna í undankeppnum eins og undanfarin ár heldur fara þau beint í einn stóran úrslitaþátt. Þau verða hins vegar frumflutt í sérstökum undanþáttum.

RÚV er þegar byrjað að auglýsa eftir lögum en þau verða að hafa borist á geisladiski þann 10. október. Rás 2 stendur síðan fyrir áðurnefndri könnun og í kjölfarið mun RÚV fara þess á leit við viðkomandi aðila að þeir semji lag. Þórhallur vonast til að listamenn taki vel í þá bón. „Það hlýtur að vera eftirsóknarvert að semja lag sem er spilað á laugardagskvöldi fyrir alla þjóðina í beinni útsendingu." Ekki er þó komið á hreint hversu mörg lög RÚV hyggst fá eftir þessari leið.

Og Þórhallur bendir á að lögin sem hafi verið samin fyrir Söngvakeppnina undanfarin ár hafi mörg hver öðlast sjálfstætt líf þrátt fyrir að hafa ekkert endilega sigrað sjálfa keppnina. Enda eigi það að vera aukaatriði, aðalatriðið sé að fá sem flest og best íslensk lög úr ólíkum áttum. „Menn eiga að sjá hana sem tækifæri fyrir sig til að koma lögum sínum á framfæri." - fgg