Þarf samt að draga úr rekstrarkostnaði

Breski bankinn Northern Rock tapaði 232,4 milljónum punda í fyrra. Þetta jafngildir tæpum 44 milljörðum íslenskra króna.

Viðskiptavinir bankans gerðu áhlaup á hann haustið 2007 og tóku út innstæður sínar eftir að spurðist út að stjórnendur hans óskuðu eftir neyðarláni hjá breska seðlabankanum nokkru áður. Bankinn var við það að fara á hliðina þegar breska ríkið skarst í leikinn og tók hann yfir til að forða honum frá gjaldþroti í febrúar 2008. Northern Rock er enn í ríkiseigu. Uppgjör hans nú er það fyrsta eftir að nýr banki reis á rústum þess gamla.

Breska dagblaðið Guardian hefur eftir Ron Sandler, starfandi stjórnarformanni bankans, að afkoman sé undir væntingum. Blaðið segir 650 manns hafa verið sagt upp hjá bankanum í fyrra og geri Sandler ráð fyrir að fleirum verði sagt upp á þessu ári í því augnamiði að draga úr rekstrarkostnaði.

Þrátt fyrir tapið fær starfsfólk bankans, 4.500 í heildina, bónusgreiðslur upp á 13,1 milljón punda, um þrjú þúsund pund á mann. Það jafngildir að meðaltali rúmri hálfri milljón króna. Greiðslurnar eru þó misháar eftir stöðugildum en fjármálastjóri bankans fær 185 þúsund pund, jafnvirði tæpra 35 milljóna króna.- jab