Ásdís Hjálmsdóttir er Íþróttamaður Reykjavíkur annað árið í röð

Frjálsíþróttakonan Ásdís Hjálmsdóttir úr Glímufélaginu Ármanni var í dag kosin Íþróttamaður Reykjavíkur annað árið í röð. Það er stjórn Íþróttabandalags Reykjavíkur sem velur Íþróttamann Reykjavíkur en verðlaunin hafa verið afhent frá árinu 1979.

Þetta er aðeins í annað skiptið í sögu kjörsins sem íþróttamaður vinnur þessi verðlaun tvö ár í röð en Bjarni Friðriksson var Íþróttamaður Reykjavíkur 1989 og 1990 og Kristín Rós Hákonardóttir hlaut þessi verðlaun fyrir árin 2000 og 2001.

Borgarstjórinn í Reykjavík, Jón Gnarr, afhendi Ásdísi verðlaunin við hátíðlega athöfn í Höfða í dag. Hún fékk af þessu tilefni farandbikar sem gefinn er af Reykjavíkurborg ásamt eignarbikar og 200.000 króna styrk frá Íþróttabandalagi Reykjavíkur.

Ásdís Hjálmsdóttir er í 23.sæti heimslistans í spjótkasti. Hún náði frábærum árangri í grein sinni á árinu 2010. Henni bauðst að taka þátt í Demantamótum IAAF þar sem hún varð í 4.-6.sæti og komst auk þess í úrslit á Evrópumótinu.

Tíu aðrir afreksmenn fengu einnig viðurkenningu fyrir árangur sinn á árinu 2010 í Höfða í dag sem afhendar voru af formanni Íþróttabandalags Reykjavíkur, Ingvari Sverrissyni. Íþróttamennirnir eru þau:

Ásgeir Sigurgeirsson, Skotfélagi Reykjavíkur

Brynjar Jökull Guðmundsson, Knattspyrnufélaginu Víking

Guðmundur Ágúst Kristjánsson, Golfklúbbi Reykjavíkur

Helga Margrét Þorsteinsdóttir, Glímufélaginu Ármanni

Hrafnhildur Skúladóttir, Knattspyrnufélaginu Val

Jakob Jóhann Sveinsson, Sundfélaginu Ægi

Sigurbjörn Bárðarson, Hestamannafélaginu Fák

Ragna Ingólfsdóttir, Tennis- og badmintonfélagi Reykjavíkur

Ragnheiður Ragnarsdóttir, Knattspyrnufélagi Reykjavíkur

Þormóður Jónsson, Júdófélagi Reykjavíkur