Fólk í lífshættu við Cowboys Stadium

Það gengur á ýmsu í Dallas þar sem SuperBowl-leikurinn fer fram annað kvöld. Veðrið í Dallas hefur verið hræðilegt síðustu daga og nú eru áhorfendur farnir að slasa sig.

Þeir sem voru fyrir utan hinn glæsilega Cowboys Stadium í gær komust heldur betur í hann krappann er snjór byrjaði að falla af þaki hallarinnar.

Stórir klakar á stærð við keilukúlur féllu einnig af þakinu og Win McNamee, ljósmyndari Getty, sagðist hafa óttast um líf sitt er ís rigndi yfir hann. Hann fjórbrotnaði á öxl og myndar ekki mikið næstu vikurnar.

Alls slösuðust sex manns þegar ísnum rigndi yfir fólkið og varð einn að eyða nóttinni á spítala.

Farið var í það í dag að sópa snjónum af þaki hússins svo fleiri slasist ekki fyrir leik.